حكاية 1300 سنة من عمر الحضارة المصرية

الحكاية الجاية ديه تقريبا مقتطفات أحداث ال ١٣٠٠ سنة الفاتت بس، هدفها اني أقرب لنفسي فكرة قد إيه الحضارة المصرية قديمة، الأرقام و التواريخ بعيدة جداً، فكان لازم أحط لنفسي Frame of Reference أو timeline على شكل أحدث سريعة عشان أفهم و ألم شوية التاريخ السحيق دة. يلا بينا.

من حوالي ١٣٠٠ سنه كان تقريباً كان آخر حكم الدولة الأموية. الدولة الأموية ديه كانت أكبر خلافة إسلامية علي مر التاريخ و واحدة من أكبر الدول الحاكمة في التاريخ. دولة كانت واصلة من مناطق في الصين شرقاً مرورا بشمال افريقيا غربا الي اسبانيا و فرنسا شمالا (حوالي ١١ مليون كم). المهم الدولة الأموية العظيمة ديه كانت بدايتها سنة ٤١ هجريا (انت بتتكلم في تقريباً ٣٠ سنة من بعد وفاه سيدنا محمد بدأت واحدة من أعظم الدول في التاريخ). بعدها بقي جه الدولة العباسية الأولى و التانية و صلاح الدين والصلابيين و المماليك و السلاجقة و التتار و هولاكو و قطز. و بعد كدة الدولة العثمانية -لاحقاً رجل اوربا المريض- و فرض الضرائب علي الفلاحين و تقريبا بعدها ب ٢٠٠ سنه كولومبوس (ال كان ايطالي علي فكرة) يكتشف قارة جديدة بالصدفة. عندك بعد كدة انجلترا و فرنسا، نابليون و الحملة، و نابليون الامبراطور و يلا نحتل روسيا أوه مون ديوه ايه ده باردون انا هستسلم. يجي محمد علي و مذبحة القلعة و الخديوي اسماعيل و احمد عرابي و الحرب العالمية الأولي و سقوط الدولة العثمانية، و حزب العمال الاشتراكي في المانيا و رحلة هتلر من عدم قبوله في كليه الفنون الجميلة في فيينا كرسام لدخولة الجيش و تبنيه شعارات الحزب و رأسته بعد كدة للحزب و لمجلش الشعب و يضم السلطة التشريعية و التنفيذية. تيجي الثورة و الملك فاروق و محمد نجيب و عبد الناصر و النكسة و بعد كدة الحرب الباردة علي شفا تقلب حرب نووية كبري و عصر حكم امريكا و الذرة و العلم و كيندي يتقتل، و موجة الأغاني الانجليزي و السيكيدلكس ذي البيتلز و نطلع القمر و مارتن لوثر كينغ و حرب اكتوبر و السادات و دول اولادي يا جيهان و الله ما ولادي و كامب ديفيد، و فيتنام، و الهند و باكستان، و روسيا تحارب في أفغانستان الثوار المعاهم سلاح امريكي و بعد كدة مبارك، و صدام يقرر يضم الكويت، اهدي يا عم، طلع الجيش المصري مقابل شطب ديون، و مترو الانفاق و كلنتون و مونيكا, و بوش و حرب العراق و ايه ده مفيش نووي و هوبا الأزمة الإقتصادية ف ٢٠٠٨ و ثورات الربيع العربي و ما ادراك ما ثورات الربيع العربي، ارحل يعني ارحل، ازمة دستور و لجان شعبية و انتخابات و ارحل تاني و انتخابات تاني و عاصمة جديدة و إعلانات رمضان كل سنه و نمبر وان و فيفي عبده- إيه ضة، و البريكسيت، و ترمب و صلاح فخر العرب و كوبري اكتوبر الساعة 8.30 الصبح يوم تلات،،، 

بس يا سيدي ال انا حكايته ده احداث سريعة لل ١٣٠٠ سنه الفاتت، ال ١٣٠٠ سنه دول بقى زيهم يبقى الفرق بين اهرمات الجيزة و حكم رمسيس الثاني واحد من أهم و أعظم الفراعنه في تاريخ مصر. يعني رمسيس الثاني كان بيحارب الحيثيين في شمال العراق و سوريا قرب تركيا سنة 1274 قبل الميلاد و الاهرامات كانت عندها تقريبا ساعتها ١٣٠٠ سنه(ال زيهم انا حكايته).

الفرق بقي ما بينا دلوقتي و رمسيس الثاني تقريباً ٢٥٠٠ سنه، يعني قبل ال ١٣٠٠ سنه الحكيتهم دول ب ١٢٠٠ سنه كمان. الاهرمات بقي اتبنت من ٤٥٠٠ سنه. 

الواحد بيعيش في الارض ديه ايه ٨٠ سنه- الاعمار بيد الله طبعا- بس ٨٠ سنه دول ال هو اتولد و لسة الحرب العالمية الثانية باديه. ولا حاجة في التاريخ ده كله، بس ده بردو اكيد شاف أحداث و اهوال و عجائب، حقيقي. بس نسبياً ال 80 سنة دول ميجوش 5 فالمية من التاريخ دة كله.

#تاريخ 

#مصر

#حضارة

#Writings

#صلاح

#ايه_الجاب_صلاح_هنا

#hashtag_abuse
#Egypt