غباء سياسي

انا بقيت حاسس ان في غباء سياسي عالمي بيحصل،،، عندك ترمب الديموقراطيين عايزين يخلعوه (تقريبا عشان يكسبوا بونط عند الناخبين في الانتخابات الجاية)، ترمب نفسة بيتشاكل مع الصين تاني أن مكنش اول اقتصاد عالمي حجما)، اوروبا في النص بتشتغل علي نفسها بس مدعوكه في النص ما بين الصين و امريكا، ده غير اصلا متبهدلة من جواها (عندك ايطاليا بدين عدي ال ١٢٠٪ من الناتج المحلي و اليونان و حط اسبانيا معاهم - مصر نسبة الدين قلت السنادي من ١٠٨) مفيش غير المانيا و ممكن فرنسا (هما ال Power horses بتوع اوربا) و إن مسلموش بردو داخليا (معتقدش في خير ابدا هيجي من سيطرة حزب يميني متطرف في المانيا, ده غير أن الاقتصاد بتاعهم داخل في مرحلة تباطئ)،،،

نعدي الشانيل و نروح لانجلترا بال Brexit و جونسون و عمايل جونسون و البرلمان ال انا مش فاهم هو عايز ايه و لا هم تقريبا عارفين عايزين ايه، و جونسون يعلق العمل بالبرلمان، البرلمان البيحاسبه شخصياً علق العمل بيه، لا و الملكة وافقت عادي،،، الهو مفرقش عنا تقريبا حاجة، بس الحق يقال و اترفع عليه قضية في ال supreme court و قضوا بأن العمله ده غير دستوري،،، جونسون يا حبيبي المفروض تحاصر ال supreme Court، لازم يجيي يتعلم عندنا. عندك الشرق الأوسط ال play ground بتاع العالم

هوبا اسرائيل بتتوسع، عندك مليشيات الحوثي في اليمن ال تحسهم جوكر زي داعش (بعد ما لعبوا دورا و اختفوا)، ليهم مهمة بيعملوها مدفوعة بأجندات خارجية، هوبا صاروخ في ارامكو هوبا دي إيران، السعوديه مش هتسكت و لازم نرد، و لا حد رد و لا حد هيرد.

عندك هنا واحد بيقولك هرب علي اسبانيا و بيخون الجيش، و بيحرض الناس تنزل بنفس الطريقة زي من عشر سنين تقريبا بنفس المسلسل و الممثلين بردو، زي الظهر تاني في نفس الوقت بردو (مبنتعلمش) و الناس سامعة و شايفة و عايشة في فساد، و شايفين أن المظاهرات هي ال حل ( تغير شخص أو مجموعة مش هيحصل حاجة، لما يجي أن شاء الله نبي مش هيغير حاجة من غير ما الناس و الأشخاص تتغير، ديه طبيعة، و شوفوا التاريخ و القصص ال في كل الكتب السماوية: نبي بينزل عايز يصلح، الناس مبتتغيرش، النبي بيمشي، و الجزاء بيجي)، و فريق تاني مش شايف انها الحل بعد تلات اربع سنين فوضي، و ابتدي يبقي في شغل و بيع و شراء (اه طبعا في قرارات ممكن تكون غلط، و أولويات و و و، بس كاقتصاد كلي ماشية). و كله مخون كله. يا مع يا ضد، يا ابيض يا اسود. يا اخواني إرهابي يا لامواخذة معرض، لا يا جدعان مش كدة، مش كدة و الله. محدش بيحط نفسة مكان التاني، انا و نفسي و تتحرق كل حاجة تانية.

الكوميدي في كل المواقف و الطرائف ال فاتت أن محدش بيعاني و ملطوط اكتر من عامة الشعب في كل الأماكن، من ساعة استفتاء البريكست ال كان حركة سياسة وسخة عشان حزب يكسب انتخابات (زي اي سياسي في بلادنا بيلعب علي مستوي المعيشة و الصحة و المعاشات)، ل تأمين صحي في امريكا، لإقليم كاشمير ما بين باكستان و الهند (دولتين عندهم أسلحة نووية) ال مش بعيد تقوم حرب عالمية في منطقتهم و تتوسع بدخول ايران و امريكا و روسيا، ما اصلها كلها مصالح سياسية، محدش بيعاني غير الشعب، و الشعب يقولك عايزين تغير أو عايزين اتقاقية، أو نعمل quantum easing تاني عشان التباطئ الاقتصادي، أو دول عايزة تتدخل عشان تنشر الديموقراطية، و الناس بتلبس بقي، حروب تحصل، اقتصادات ببتبهدل، هوبا ازمة لاجئين هوبا مشاكل علي الحدود. دوامة و سياسة و الناس في النص.

انا هقدم طلب رسمي ل ألون ماسك يخودني معاه المريخ نبدأ علي نضافة.

انا مش يقدم حل دلوقتي، انا بعرض وجهة نظر بناء علي الوضع العالمي، مش ب categorize حد و لا عايز حد يحطني في قالب أو مع مجموعة أو فريق ضد فريق.

#يلا_مريخ

#كفاية_كدة_علي_الارض

#هو_في_ورق_عنب_في_المريخ

#ذهاب_فقط

#السياسة_نجاسة

26 September 2019